Մի քանի խորհուրդ ՄՌԿ մասնագետից

Հեղինակ` Մարիետա Սաֆարյան
(Բրեվիսի ՄՌԿ և կազմակերպության զարգացման ավագ պատասխանատու)

Դու դպրոցում և համալսարանում շատ լավ ես սովորել, և քեզ, որպես լավ ու պարտաճանաչ սանի, օրինակ են բերել ուսուցիչները տարբեր առիթներով։ Դու անկասկած վստահ ես, որ համալսարանից հետո ունենալու ես շատ հետաքրքիր և բարձր վարձատրվող աշխատանք ու ստեղծելու ես կարիերայի քո ուղին։

Բայց արի ու տես, համալսարանը վաղուց ավարտել ես ու դեռ աշխատանք չես կարողանում գտնել։ Մի քիչ չարացել ես, իսկ հարևան-բարեկամներն էլ առիթը բաց չեն թողնում ասելու, որ «հիմա առանց ծանոթի չի լինի, եթե անգամ ՔՈ նման լավ սովորողը չի կարողանում աշխատանք գտնել, մյուսներն էլ ի՞նչ ասեն»։

Այո՛, սա շատ տարածված խնդիր է. բոլորը միշտ բողոքում են աշխատատեղերի բացակայությունից։ Այնուամենայնիվ, փորձենք հասկանալ, թե ինչ կարող ես անել հենց ԴՈւ իրավիճակը փոխելու համար։

Տարբերակ 1։ Կզարմանաս, բայց արդեն համալսարանական տարիների ընթացքում պետք է սկսես աշխատել։ Աշխատել ոչ միայն զուտ գումարի համար, այլև՝ ձեռք բերելու շատ կարևոր հմտություններ, որոնք հետագայում կօգնեն քեզ աշխատանք գտնել։ Անվանենք դա աշխատանք, պրակտիկա կամ հիմա տարածում գտած բառով՝ «ինթերնշիփ»։ Հավատա, որ նման փորձառությունը շատ կարևոր է։ Հարցազրույցների ժամանակ մենք՝ ՄՌԿ մասնագետներս, հանդիպում ենք դիմորդների, ովքեր լիովին կտրված են իրականությունից ու անգամ չունեն տարրական շփման հմտություններ։ Բայց չէ՞ որ կարելի է մի քիչ ջանք թափել, մասնակցել տարբեր ծրագրերի, դառնալ կամավոր կամ ինթերն, հաղորդակցվել, հասկանալ՝ ինչ է կատարվում ընկերություններում, ինչ պահանջներ ունի աշխատաշուկան, և համալսարանն  ավարտելուց չլինել «բոբիկ»։

Տարբերակ 2։ Քեզ անկասկած կօգնի աշխատանքի դիմելու մշակույթին ծանոթ լինելը։ Համացանցում շատ տեղեկություններ կան CV կազմելու, հարցազրույցին պատշաճորեն ներկայանալու և այլնի մասին։ Այս ամենը կա, բայց պետք է նաև հետևել այդ խորհուրդներին։ Դա միայն ու միայն օգնելու է քեզ։ Փորձենք մի քանի կետով նշել կոպիտ սխալները, որոնք գուցե անում ես, և հենց այդ պատճառով քեզ չեն հրավիրում հարցազրույցի։

  • Դու չես կարդում աշխատանքի հայտարարությունը։ Վստահորեն հիմա ժպտում ես, որովհետև հիշեցիր, որ իսկապես ՉԵՍ կարդում։ Կարդում ես վերնագիրը միայն ու դիմում ես աշխատանքի համար՝ առանց պահանջներին ծանոթանալու։ Ու հերթական անգամ քեզ չեն կանչում հարցազրույցի, քանի որ չես համապատասխանում (իսկ չկարդալով դիմելու դեպքում հիմնականում այդպես էլ լինում է)։ Հիասթափվում ես կրկին։ Ծանոթ արտահայտություն է, չէ՞, «լիքը տեղ CV ուղարկել եմ, ոչ մի տեղից չեն կանչել»։
  • Դու ուղարկում ես սխալ կազմված CV։ Մի քիչ մանրամասնենք։ «Սխալ» ասելով՝ նկատի չունենք ինչ-որ չափանիշներ խախտելը։ Չկա մեկ ընդունված ձևաչափ, որին պետք է հետևել։ Պարզապես անհրաժեշտ է գրագետ կերպով ներկայացնել տվյալ հաստիքին առնչվող տեղեկությունները։ Մեկ խորհուրդ ևս. CV-ում տեղադրելու համար ընտրիր համապատասխան նկար, այլ ոչ թե այն նկարը, որը շատ «like» է հավաքել սոցցանցերում։

Եվ վերջում, ուղարկիր CV, եթե ընկերությունն ունի թափուր աշխատատեղ, և դու դիմում ես հենց այդ աշխատատեղի համար։ Հենց այնպես ուղարկված CV-ները կորչում են՝ հերթական անգամ հիասթափեցնելով քեզ։

Տարբերակ 3։ Դու արդեն հարցազրույցի ես հրավիրված. վերջապես հաջողվեց։ Այստեղ հիշենք Տարբերակ 1-ը։ Եթե կարդացել ես հայտարարությունը և վստահ ես, որ ուզում ես կատարել հենց այդ աշխատանքը, դա չնկատել հնարավոր չէ։ Իսկ սա արդեն պայմանական +1 է դրական տպավորություն թողնելու գործում։

Միշտ եղի՛ր կոկիկ. և՛ արտաքին տեսքի, և՛ խոսքի ու վարքի կոկիկության մասին է խոսքը։ Դու ունես հնարավորություն ներկայացնելու քեզ, քո փորձը։ Ուրիշ էլ ոչ ոք չի անելու դա քո փոխարեն։ Ուրեմն եղի՛ր հստակ ու պատմի՛ր այն, ինչ կա, առանց չափազանցեցնելու կամ քեզ թերագնահատելու։ Հիշի՛ր, երբ սկսես աշխատել այդ կազմակերպությունում, միևնույն է, ամեն ինչ «ջրի երես է դուրս գալու»։

Դու, ինչպես և շատերը, հավանաբար չես խուսափում տարածված սխալներից։ Ասենք՝ հարցերին տալիս ես ընդհանրական պատասխաններ, առանց օրինակներ բերելու։

ՄՌԿ մասնագետ – Տվյալ ծրագրի շրջանակներում ո՞րն է եղել Ձեր գործառույթը, ի՞նչ եք արել։

Դիմորդ – Դե՜, ես շատ տարբեր և հետաքրքիր գործեր եմ արել։

Համաձայն ես, չէ՞, որ պատասխանն իրոք ոչինչ չի ասում, ու դու արդեն կորցնում ես պայմանական 1 միավոր տպավորությունների քո «փաթեթից»։

Երբեք մի՛ մտածիր, որ ՄՌԿ մասնագետն անտեղի հարցեր է տալիս։ Երբ քեզ հարցնում են քո ներկայիս կամ նախկին գործընկերների, սիրած գրքի, մանկական երազանքի, անգամ իրենց գրասենյակը գտնելու հեշտության մասին, հավատա, դա իրո՛ք կարևոր է և նշանակություն ունի։ Ախր, դու չգիտես, չէ՞, ինչ է ենթադրում տվյալ աշխատանքը։ Իսկ ՄՌԿ մասնագետը վստահաբար գիտի։

Անպայման ուսումնասիրիր այն ընկերությունը, ուր դիմել ես ու հրավիրված ես հարցազրույցի։ Անընդունելի է, երբ հարցազրույցի ներկայացած դիմորդն ասում է․ «Կներեք, կպատմե՞ք ձեր ընկերության մասին։ Ես ծանոթ չեմ»։

Տարբերակ 4 Դու չես համապատասխանում։ Արդյունքում դու գուցե և չընտրվես տվյալ աշխատանքի համար, քանի որ այն մասնագետը չես, ում փնտրում է կազմակերպությունը։ Սովորիր ընդունել այս իրողությունը։ ՄՌԿ մասնագետն ավելի լավ գիտի աշխատանքի բնույթը և ներքին կորպորատիվ մշակույթը, ուստի և կարող է հասկանալ՝ որքանով ես համապատասխանում աշխատանքին։ Իսկ դու պետք է ընտրվես այն աշխատանքի համար, որին իսկապես համապատասխանում ես և որը կսիրես։ Հիշի՛ր, շատ կարևոր է սիրել աշխատանքը. դա արդյունավետության ու լավ աշխատելու գլխավոր պայմանն է։


Հեղինակ

Breavis

Կարդացեք նաև․․․

Breavis Web

Հանրային կարծիքի ուսումնասիրություն 2023. Հայաստանի առկա բնակչություն

Միջազգային հանրապետական ինստիտուտի Հարցումների հետազոտության կենտրոնի համար, Բրեվիսի կողմից վերջերս իրականացված հանրային կարծիքի ուսումնասիրությունը, ստեղծում է Հայաստանի բնակիչների կարծիքների և տեսակետների նշանակալի պատկեր։ Հարցումը անցկացվել

Breavis Blog1 3

Էներգաարդյունավետությունը բազմաբնակարան շենքերում. հետազոտություն Հայաստանում

Կայուն ապագա ապահովելու մեր շարունակական ձգտման գործում կարևոր է հասկանալ բնակելի շենքերում էներգաարդյունավետության բարելավման ներուժը: Բրեվիսը ՄԱԶԾ-ԿԿՀ ծրագրի շրջանակներում 2023 թ. հունվարից մարտն ընկած ժամանակահատվածում

Breavis Blog3

Հանրային կարծիքի ուսումնասիրություն 2022 հուլիս. Հայաստանի առկա բնակչություն

ԱՄՆ միջազգային զարգացման գործակալության կողմից վերջերս ֆինանսավորված նախաձեռնության շրջանակներում Բրեվիսն իրականացրել է հանրային կարծիքի ուսումնասիրություն Միջազգային հանրապետական ինստիտուտի Հարցումների հետազոտության կենտրոնի համար։ Հետազոտությունն իրականացվել է