«Բրեվիս» ընկերության Հետազոտությունների բաժնի ղեկավար Հասմիկ Առաքելյանը մարտի 1-ին Արցախի պետական համալսարանում անց է կացրել «Հանրային կարծիքի ուսումնասիրության կարևորությունն ու չափման մեթոդները» թեմայով դասախոսություն-քննարկում։ Համալսարանի ուսանողներից ու պրոֆեսորադասախոսական կազմից բացի, քննարկմանը ներկա էին նաև ԱՀ մարդու իրավունքների պաշտպան Արտակ Բեգլարյանը և ԱՀ Ազգային ժողովի նախագահ Աշոտ Ղուլյանի օգնական Անուշ Ղավակյանը։
Խոսելով հանրային կարծիքի ուսումնասիրության դերի մասին՝ Հասմիկը շեշտ է դրել ոլորտի վերաբերյալ տեսական գիտելիքներին զուգահեռ ուսանողների գործնական հմտությունների զարգացման անհրաժեշտության վրա․ «Ուսանողները, որպես կանոն, միայն տեսական գիտելիքներ են ունենում և պրակտիկ դաշտում այդ ամենը կիրառելու համար անգամ չեն ստանում անհրաժեշտ տեսլականը»։
Այս համատեքստում մեր կողմից կարևորվում են նմանատիպ դասընթացներն ու քննարկումները, որոնց շնորհիվ փորձառու մասնագետները հնարավորություն են ստանում ուղղորդելու քննարկման մասնակիցներին՝ ցույց տալով տեսական գիտելիքների օգտագործման ուղղությունները։
